شوفتوا امبارح حصل ايه ؟؟؟

بسم الله الرحمن الرحيم 

على طريقة بكار " هووواى اصحابى شوفتوا امبارح حصل  ايه " و بعده يبدأ يقولنا الاحداث اللى كانت فى الحلقه اللى فاتت و اللى قبلها  بغض  النظر عن  انه مسلسل كارتون مش قد كده لكن كنا بنحبه لانه  عمل مصرى  و لانه كان مرتبط بشهر رمضان  وكمان عشان خاطر "حسونه " زميل بكار المشاغب و الجده بخيته و الخال سيدون و مشرط الشرير و مننساش رشيده معزة بكار .. مع غناء محمد منير للتترات بطريقته الرائعه " من صغره وصغر سنه*** عارف مع انه  *** من قلبه وروحه مصرى ***و النيل جوا بيسرى  ....."

و فى تتر النهايه يقول " ابوكف رقيق وصغير بكار*** و عيون فنان محتار *** ابوضحكه وصوتها ف قلبه *** بيضوى الف نهار .."

ياااااااااه ذكريات جميله  

رغم ضعف الامكانيات و التقنيات و القصه و الفكره التى انتج من خلالهم مسلسل بكارمقارنه بما يتم انتاجه فى هوليود من افلام كارتون  الا اننا  نحب بكار و نشعر بحنين كبير عندما نسمع مجرد تترات المسلسل و تتسرب ابتسامه خافته الى الوجوه  ....

ما هذا لقد نسيت الموضوع الاساسى و سرحت مع "ابوكف رقيق " ...هههههههههه

هووواى اصحابى شوفتوا امبارح حصل ايه ؟؟؟

حصل حاجات كتير اووى  

القبض على (سرور و زكريا عزمى و عز و جرانه وصفوت الشريف و علاء مبارك و جيمى حبيب قلبى و حبس الرئيس السابق حسنى مبارك و ماما سوزان يا ماما سوزان دورك جاى يا ماما سوزان ) 

ده بالاضافه لهروب (الغالى  و حسين سالم  وشويه ناااس كده ) 

حاجات كتير حصلت تانى بلدنا ما اكثر اخبارها هذه الايام  

التعديلات الدستوريه  و الموافقه عليها و غزوة الصناديق  و التهجم على شيخنا الجليل  ابوعلاء محمد حسين يعقوب 

فى اطار حمله كبيره تختص بالهجوم على السلفيين  ابرز قيادى الحمله  اليوم السائع و الترزى اليوم  ..

اه  نسييت وحل امن الدوله  لأ و حاجات كتير كتير  

دلوقتى البلد فى مشكله حقيقيه  ان الثوره لسه واصله الصعيد  

و اخواتنا الصعايده مبيهزروش اول حاجه قطعوا السكه الحديد و مش عاجبهم اى حل و لا طريقه لحل المشكله  الا كلامهم وبس 

انا عارف ان محافظات الصعيد ظلمت كثيرا فى العهد البائد كما ظلمت محافظات اخرى ايضا  لكن ليس ذلك الوقت الذى نشعل فيه الازمه و نوقف البلد .. العمليه مش ناقصه .... ربنا يعديها على خير ..

فى احتمالات لعودة العلاقات المصريه الايرانيه و ده شئ جيد برضو  ايران قوه مهمه فى المنطقه و التعاون معها هيبقى مهم  وبرضو تركيا ابدت ترحيبات هائله بالتعاون مع مصر و تطوير العلاقات و ده برضو حاجه رائعه جدا بالنسبه لنا تركيا بلد كبيره و التعاون معها هيكون مثمر جدا ..

الخبراء غير متفائلين بخصوص عودة اموال ال مبارك  و حسين سالم و غالى  

لكن شخصيا انا متفائل واعتقد ان ستعود بطرق سهله كمان

و يذكرنى قول تشارلز ديكنز " حتى اضخم الابواب مفاتيحها صغيره " 

                                          

وحشتونى وحشتونى وحشتونى

بسم الله الرحمن الرحيم 

بقالى فتره كبيره معملتش اى تدوينه هنا فحاسس شويه بالغربه و انا بكتب رغم  ان افكار تدوينات كتير بتيجى فى بالى طول الوقت خصوصا فى المواصلات ,, و بتندم كتير انى مبيبقاش معايا ورقه اسجل فيها الفكره  ... لكن  ياللا كله خير بإذن الله  

الواحد كان بيستغرب لما مقدم برنامج فى التلفزيون يكلم الجمهور و يقول " وحشتونى او بحبكم او اى كلام من النوعيه دى " لكن دلوقتى انا مش مستغرب خالص فعلا حاسس بحنين للكتابه هنا  ...

طبعا بحب اشكر كل الناس اللى كان لها ملاحظات على كل بوست و كل واحد رديت على ملاحظته ووصله الرد و سعيد بالتواصل بينا 

....

اخواتى اللى طلبوا انى افتح التعليقات  انا بعتذر لهم  مش هاقدر انفذ طلبكوا  ده  

لكن ممكن اشوف طريقه تانيه للتواصل  و ارسال التعليقات و الملاحظات على اى بوست 

شكرا لكل الناس اللى شجعتنى و الناس اللى انتقدتنى و الناس اللى معرفش وصلت للميل بتاعى منين و كلمتنى  

وحشتونى

تتمة موضوع الدوله المدنيه

بسم الله الرحمن الرحيم 

صحيح انا كنت مشغول جدا الفتره اللى فاتت  .. لكن مش ده اللى منعنى  انى اكمل الكلام فى سياق الموضوع السابق الخاص بالدوله المدنيه هو مصطلح جديد على مسامع الكثيرين منا  ..  اللى اخرنى فى الاستمرار فى الكتابه هو ان كنت بتقصى فى الموضوع على قد ما اقدر  فقد رأيت مقالات عجيبه و غريبه و تعارض بعضها و كلاها ربما يتأخذ نفس البراهين و يفندها بما يهوى ليثبت  وجهة نظره .. على كل حال حان الوقت لانهى ما بدأت ...

• قمت بالبحث فى جوجل عن مسمى دوله مدنيه  لاجد فعلا نتائج باللغه العربيه  لكن كده جرب و ابحث عن  "Civil Country" لن تجد شيئا او تعريفا لهذا الشئ ,, الم يصدعوننا  ان الدول المتقدمه هى دول مدنيه ؟؟ اليس غريبا الا تعرف هذه الدول معنا واضحا للمدنيه  .. لكن بالمقابل اذا بحثت عن مصطلح " Secular Country " - دوله علمانيه - ستجد التعريفات كثيره و الشرح بأستفاضه و اذا بحثت عن دوله اسلاميه " Islamic country " ستجد نتائج و تعريفات  كثيره ايضا ..... القصد ان المصطلحين المعروفين من المصطلحات المعروفه  هما  دوله اسلاميه و دوله علمانيه اما مصطلح دوله مدنيه  فاللى يعرف حاجه عنه يقولى ؟؟
•   من ضمن ما قرأنا فى المقالات العجيبه التى اصبح اصحابها يفهمون فى كل شئ  فقد ذهب بعضهم  ان الرسول - صلى الله عليه و اله و سلم -  اقام دوله مدنيه و لم يقم دولة دينيه ... هرشت رأسى بقوه لاحاول انا استوعب ما قاله  المقال  و استوضح كيف ؟؟   اتمنى  ان يكون كتاب هذه المقالات على وعى بما يكتبوه .. بالمناسبه  مقال الدكتور يحى الجمل انا لا معاه و لا ضده انا بس كنت نقلته هنا عشان بس هو مكتوب قبل اى ضغوط و من اكثر الاراء توسطا  ...
• ناس سألتنى  انته عاوز دوله عامله ازاى  ؟؟  فكان جوابى " انا عاوز دوله تحكم بشرع الله تسموها مدنيه علمانيه اسلاميه طعميه  ,, المهم  تحكم بشرع الله  " 

فى نفس الامر برضو فى ناس زعلانه و معترضه  على تطبيق الشريعه الاسلاميه  ليه ياعم ؟؟؟

اصلهم هيقطعوا ايد السارق ؟؟ 

 - طب و انته ايه اللى مزعلك الا لو كنت  حرامى !!

اصلهم هيرجموا او يجلدوا الزانى ؟؟؟ 

- طب انته ايه اللى مزعلك  الا لو كنت و لا بلاش !!!

اصلهم هيفرضوا الجزيه على النصارى ؟؟

 مفيش الكلام ده ياعم ,, الجزيه تفرض فى حالة  عدم مشاركة النصارى فى حماية البلاد من جيش و شرطه  و لكنهم الان يشاركون لذا لداعى لوجود جزيه ..

اصلهم هيحرموا الخمور و المخدرات ؟؟ 

ااه على اساس ان الخمور و المخدرات دى  مقدسات  دى كلها بلاوى و زفت وقطران و بتهلك الصحه و بتهدد المجتمع وشوف  انته المدمنين و السكارى بيعملوا ايه كده و انته تعرف ليه ممكن تجريم المخدرات .

اصلهم ....؟

هتقول ايه تانى  اقولك انا اصلهم عاوزين الخير ليك ,, اصل الشريعه الاسلاميه مش هيبقى فيها ضرر عليك حتى لو كنت نصرانى  ,, اصل الكلام واضح فى موضوع الشريعه و سماحتها  ,, و اصله عيب كل شويه واضح يطلع يهاجم و للاسف معظمهم مسلمين   ..

ربنا يهدى الجميع